HARIRING KURING

Ku: Wangsa Susena, S.Pd.I

Ya Alloh Nu Maha Heman
Paparin Abdi kakiatan
mugia syukur jadi kabiasaan
pados Anjeun ngaberkahan

Ya Allah Nu Maha Kawasa
Mugia Anjeun ngajaga ngariksa
maparin hidayah salawasna
tug dugi kaluarna ieu nyawa

Ya Allah Nu Maha Gagah
Mugia Anjeun netepkeun hidayah
ka jiwa nu sok keuna ku owah
ka raga nu sering nincak salah

Duh Sang panutan
Nu jadi kakasih pangeran
Mugia kawilujengan nyarengan
Allah salawasna ngarahmatan

Duh Anjeun nu pinuji
mibanda akhlak utami
Hormateun saban jalmi
sadaya makhluk nu aya dibumi

Duh anjeun rasul pilihan
Nu nyandak risalah pangeran
Pamingpin para utusan
Mibanda kasampurnaan

He jalma nu ngaku iman
Omat ulah kamalinaan
Kudu ngestokeun ajaran
Bari jeung dipigawean

He jalma nu ngaku Iman
Tong poho ka hiji patempatan
Nu bakal jadi padumukan
Geura tatahar bebekelan

Di dunya urang ngumbara
Hamo hirup salilana
Umur aya putusanana
Paeh teu nyaho dimangsa

Sing hade ka sasama
Silih jaga silih riksa
Ibadah sing iatna
Ngarah pinanggih bagja

Bagja dunya bagja akherat
Harepan sakabeh umat
Hiji nu jadi syarat
Urang kudu melak taat

He jalma geura tarobat
Tong talangke kana sholat
Tong lalawora kana amanat
Bisi datang waktu sakarat


Maot eta ngadodoho
Hamo bisa dipoho-poho
Datang teumere nyaho
Ngageureutak taya tempo

Harta banda hamo kabawa
Kitu keneh kulawarga
Anak bojo nu dipikacinta
Ukur bisa nganteur ku cimata

Dikuburan ukur sorangan
Ukur Amal nu maturan
Amal sholeh tanda kabagjaan
Amal salah tanda kacilakaan

Amal nu jadi ukuran
Dina babakti ka pangeran
Agama nu jadi patokan
Dina ngahontal kabagjaan

Al-qur’an kudu jadi pedoman
Hadits nabi oge jadi patokan
Dina nyuprih ridho pangeran
ngarah jauh tina kasalahan

lampah salah matak cilaka
matak bendu nu Kawasa
hirup bakal sangsara
di dunya oge akherat jaga

Lampah sholeh matak maslahat
Alloh hamo bendu komo ngalaknat
Hirup pinuh ku taat
Bagja didunya sareng di akherat.

Subang, 15052010