MAKNA HAKEKAT HIJRAH

Ku: Wangsa Susena, S.Pd.I.

فمن كانت هجرته إلى الله ورسوله فهجرته إلى الله ورسوله , ومن كانت هجرته إلى دنيا يصيبها و امرأة ينكحها فهجرته إلى ما هاجر إليه " متفق عليه

“…… Maka Sing saha nu (niat) hijrah ka Allah jeung Rosul-Na, maka hijrahna nyaeta (mibanda ajen) hijrah ka Alloh jeung ka Rosul-Na. sedengkeun jalma nu (niat) hijrahna pikeun mibanda kaduniawian atawa demi hiji wanoja, maka hijrahna nyaeta (mibanda ajen) sakumaha nu diniatkeunana:” (Mutafaqun ‘Alaih)

Muharam teh bulan awal tina taun hijriyah, mun di jawa mah disebut bulan suro, disebut suro soteh cenah sakaul nyebutkeun dicokot tina kecap \Asyuro atawa tanggal sapuluh dina ieu bulan. jadi docokot tina tungtung kecap asyuro, jadi weh suro. Keun lah masalah ngaran mah tong jadi padungdengan, nu penting mah nyaeta aya naon di bulan Muharam teh ? kitu meureun nya ?

Bulan Muharam teh bulan agung kalebet kana Asyharul Hurum atawa bulan-bulan nu dimuliakeun ku Alloh, sabab dina bulan ieu kacutat sajarah penting nu kudu jadi pieunteungeun urang sarerea salaku Umat Islam. Anapon sajarah nu kacutat dina bulan ieu teh, nyaeta hijrahna Kanjeng Nabi S.A.W. sareng para shohabat-shohabatna.

Hijrah munggaran ti Mekkah ka Habasyah nalika kaum musyrikin ngaganggu, ngantegan, ngagokan kana da'wahna Rosulullah s.a.w. Hijrah munggaran ieu lumangsung dina taun kalima tina kanabian, kitu miturut Imam Baihaqi.

Hijrah nu kadua nyaeta hijrah ti Mekkah ka Madinah nu lumangsung dina taun katilu belas tina kanabian Rosulullah s.a.w. nu harita saban-saban umat Islam wajib hijrah bareng sareng Rosulullah s.a.w. urang tos pada uninga kumaha perjuangan Rosulullah s.a.w. sareng para shahabat-shahabatna nalika ngalakuekun hijrah, estu pinuh ku pangrubanan nu kacida luhung ajenna, ti mimiti harta, tanaga katut jiwa ditandonkeun pikeun bajoang nyi’arkeun agama Alloh.

Makna kecap Hijrah nyaeta ngasingkeun jeung ninggalkeun (Al-Mujaafaah Wat-Tark). Aya oge nu nyebutkeun Hijrah maknana 'indit-inditan atawa pindah ti tempat hiji ka tempat sejen’, sakumaha nu geus dilakukeun ku Kanjeng Nabi s.a.w. sareng para shahabat-shahabatna.

Ibnu ‘Arobi sasauran, yen para Ulama ngabagi lalampahan manusa dina indit-inditan atawa hijrah kana dua wanda, nu kahiji nyaeta indit-inditan atawa hijrah nu tujuanana pikeun ngahindarkeun diri tina hiji perkara atawa kajadian, nu kadua, nyaeta indit-inditan atawa hijrah nu tujuanana pikeun neangan hiji perkara.

Wanda nu kahiji, nyaeta indit-inditan atawa hijrah pikeun ngahindarkeun diri tina hiji perkara atawa kajadian, dibagi deui jadi genep rupa, nu diantarana:

1. Kaluar ti daerah musuh (Darul Harb) nuju ka daerah nu aman (daarul Islaam), hijrah saperti kieu tetep lumangsung tug nepi ka poe kiamat.

2. Kaluar ti nagri bid’ah, hal ieu dijelaskeun ku Ibnul Qosim anjeun kungsi nguping sasauran Imam Malik, yen teu halal salah saurang oge pikeun netep renggenek di hiji nagri nu dijerona aya kalakuan nu ngahina, jeung nyacampah kaum salaf.

3. Kaluar ti nagri nu dijerona loba hal-hal haram nu dilakukeun.

4. Kaluar dina raraga ngahindarkeun diri tina hal-hal nu matak cilaka. Sakumaha nu geus dilakukeun ku Kanjeng Nabi Ibrahim a.s. (Al-Ankabut ayat 26) jeung Kanjeng Nabi Musa a.s. (Al-Qashash ayat 21).

5. Kaluar ti nagri nu keur keuna ku hiji panyakit nu matak bahaya. Saperti nagri nu rahayatna kakeunaan ku panyakit kusta, lepra jeung nu sajenisna,

6. Kaluar ti nagri nu teu aman tina gangguan manusa-manusa jahat nu ngaganggu kana harta banda rajakaya, saperti lobana garong, rampog jeung sajabana,

Satuluyna wanda nu kadua, nyaeta indit-inditan atawa hijrah nu tujuanana pikeun neangan hiji perkara. Indit-inditan atawa hijrah ieu dibagi deui jadi salapan rupa, diantarana nyaeta:

1. Indit pikeun nyiar luang pangalaman kahirupan.

2. Indit pikeun ibadah haji

3. Indit pikeun jihad fi sabilillah

4. Indit pikeun nyiar kifayah kahirupan

5. Indit pikeun dagang/usaha atawa nyiar rizki nu halal pikeun nykupan pangabutuh kahirupan kulawarga.

6. Indit pikeun nyiar elmu pangaweruh, saperti masantren, sakola jeung sajabana.

7. Indit nuju ka tempat-tempat nu mulia, saperti masjid, mushola jeung majlis ta’lim

8. Indit pikeun ngajaga wilayah tina ancaman musuh-musuh nagara

9. Indit pikeun silaturrahim

Subang, 7122010