Tingkah Jalma Mabok

Ku: Wangsa Susena, S.Pd.I

Kacaritakeun aya jalma nu buraong, tukang bobok tukang tarok, tukang mukaan tali anderok, tukang ngarawuan taeun orok.. (heu heu)... awakna betekok, unggal poe gawena ukur mabok. hiji waktu manehna teh mabok a'o nepi ka teler, mata beureum, awak jibrug ku kesang, leumpang rampual-rampeol sososloyongan, bakating geus teu kuat meureun gedebut manehna teh ngaguprakeun awakna di sisi jalan, meni ngajoprak teu walakaya. jelema nu lalar liwat ngarantep da geus apal nu ngajoprak si eta tukang mabok tea, jadi geus teu paduli deui, rek ngajoprak malah mun seug jengkerna oge sigana barungah da gawena teh ukur ngieun kaonaran bae.

Kocapkeun datang wayahna subuh, jalma nu mabok teh lilir da kageuingkeun ku sora adzan nu melewung dimasigit, nu memang teu jauh ti tempat manehna ngajoprak, tuluy manehna teh nguniang hudang, luak-lieuk bari katingal siga nu can sadar tina urut mabok, da leumpangna rarampeolan keneh, tuluy manehna leumpang nuju ka masigit, geus nepi ka masigit teu langsung asup ka jero masigit, katingali manehna teh ka jamban heula, beberesih tuluy abdas, geus kitu mah sup bae asup ka masigit. barang geus dijero kasampak ustad keur sila bari gegerendengan wiridan. ningal aya nu datang eta ustadz nyampeurkeun bari tuluy nyarita, semu nu rada nyentak:

"Rek naon siah... mabok-mabok asup ka masigit...?"

"Tenang ....tadz.. !.. apan kuring teh rek insyaf.. rek miluan sholat ...aeh.. bener kitu ayeuna teh.. wayahna sholat shubuh ?..." Jawab nu mabok bari gudag-gideug..da tetep siga nu lieur da katingali panonna beureum.

"Heueuh alus euy... jeung bener ..deuih ayeuna mah memang wayahna sholat shubuh..., ke.. ke.. kuring rek nanya.. ari sholat shubuh.. sabarah roka'at ?" tanya ustadz.

"Ha..ha... na ari pa ustadz.. make nanya roka'at sholat shubuh sagala... apan ti baheula oge.. sholat shubuh mah.. tilu roka'at....he he.. bener teu tadz..?" Jawab nu mabok sangeunahna.

"Leuh.. dasar siah...maneh mabok ..keneh... jig siah kaditu.. indit...cageurkeun heula mabok maneh.. ke geus cageur mabokna ..karek insaf.. mendingan kaditu balik..siah...!" ceuk ustadz..ngusir

"Jadi kuring teu meunang ..sholat shubuh nu tilu roka'at.. ?". ceuk nu mabok malik nanya

"Lain teu meunang sholat siah... jeung eta ..meni keukeuh sholat shubuh tilu roka'at.... jung siah kaditu..cageurkeun heula mabok anjeun, ke lamun anjeun geus sadar tina mabok heug bae.. rek sholat.. oge..." jawab ustadz

"Naha make teu meunang...?"Tanya nu mabok

"Alah ..siah.. apan geus jelas... ayatna oge... Poma maraneh tong ngadeukeutan sholat mun seug maraneh mabok... kitu tah ayatna.. ayeuna ngadeukeutan oge teu meunang.pikeun nu mabok.komo mun prungna sholat..geus ayeuna mah.. anjeun geura balik bae..kaditu.." Jawab ustadz bari ngaujurungkeun balik deui.

Nya dijujurung bari satengah diusir kitu mah, nu mabok teh nurut kaluar ti masigit..barang geus nepi ka lawang masigit, manehna tepung jeung jama'ah nu rek sholat shubuh berjama'ah, tuluy nu mabok teh nanya ka eta jama'ah:

"Rek kamana euy...?"

"Nya rek sholat shubuh..atuh..!" Jawab eta jama'ah

"Ke.. ke... rek ..nu sabaraha roka'at sholat shubuhna..?" tanya nu mabok

"Nya... dua roka'at ....atuh..." Jawab jama'ah

"Ha..ha..ha.... dua roka'at.?.. geus ayeuna mah balik bae... tong tulus.. sholat shubuhna.."Ceuk nu mabok ka eta jama'ah

"Naha... ?" tanya jama'ah.

"Komo nu shubuh du'a roka'at... cacak kuring nu shubuhna tilu roka'at oge di usir teu meunang.. sholat.." Jawab nu mabok.. bari nongtoyod..kaluar..

??????

Caaag

Subang, 07112010