Gaganti Qunut

Ku: Wangsa Susena, S.Pd.I

Kacaritakeun aya jalma nu eling kasareupnakeun, ngan hanjakal henteu bodo alewoh tapi bodo heot, heueuh teu bisa ngaku bisa, teu peinter ngaku bodo (heu heu...eta-keneh nya?).

Dina ibadahna getol, ngan hanjakal henteu make elmu, antukna sering digeunggeureuhkeun ku pamajikanana, demi nu digeunggeureuhkeunana lain sadar kana kabodoanana, kalah ka nyanggereng malik muncereng, nya pamajikanana ngelehan, batan kudu pasea, pamikiran pamajikanana keun bae ah, sakitu oge untung sadar daek ibadah, keun bae salah saeutik mah ke oge diomean kumaha maneh.

Kocapkeun hiji waktu, manehna indit-inditan jeung rombongan ka hiji acara, kabeneran inditna teh ba'da isya, ngarah nepi ka tempat wayah shubuh, tujuanana ngarah rineh bisa tatan-tatan sapuratina, da acarana mah isuk jam tujuh teng teh prung.

Teu kacatur dijalanna, kacaritakeun geus nepi ka tempat, sup bae rombongan teh ka penginapan nu geus diperenahkeun panata calagara, bus bae manehna jeung rombongan teh arasup ka kamar penginapan, kabeneran geus shubuh malah rada leuir aya kana satengah jamna, nya teu talangke rombongan teh langsung ka carai arabdas seja sholat shubuh, ngan ku sabab kamar mandina ukur dua, jadi bagilir ka cai na teh, kabeneran manehna kabagean panungtung, atuh batur mah geus bareres sholat shubuh ka mushola nu aya dipenginapan, manehna ngahaja teu ka mushola, jadi sholat shubuhna di kamar penginapan.

Ngan manehna teh siga nu rada bingung, da hulang-huleng heula memeh prung ngalkonan sholat shubuh teh, tapi teu lila kituna teh, da terus prung sholat, ngan pas tahiyat akhir manehna henteu salam, kalah ka cengkat deui nambahan saroka'at, jadi tilu roka'at, kabeneran aya salah saurang rombongan nu ningalieun, nya panasaran langsung nanya:

"Pak ..punten nembe teh..abdi ningali bapa netepan.. naha bet sholat shubuh janten tilu roka'at, hapunten ieu mah bilih bapa hilap.. "

"Ah ..ngahaja jang... bapa mah...lain poho..."Ceuk manehna ngajawab

"Naha bet ngahaja...kitu.. da sholat shubuh mah dua roka'at..pa..?"Ceuk salah saurang rombongan nu ningali tadi tea malik nanya.

"Yeehh... enya bapa mah ngahaja... sholat shubuh tilu roka'at.. tah... nu saroka'atna.. gaganti Qunut... da bapa teu bisa Qunut.. kitu jang...tapi kade tong geruh..nya jang..!" Ceuk manehna bari luak-lieuk

"Beu... ari si bapa.. nya lepat atuh pa... pami teu tiasa QUnut mah ..teu kenging digentos ku saroka'at, da eta mah ikhtilaf furu'iyah, bade diangge ...mangga ..henteu oge teu jadi pasualan... ngan saupamina urang ngiringan ka golongan paham nu ngangge qunut, cekap gentos bae ku do'a nu sanes saupamina urang teu tiasa aosan qunut, ..janten henteu kedah digentos ku saroka'at... beu'..ari si bapa... manawi teh..?......"ceuk alah saurang rombongan nu ningali tadi tea ngajelaskeun..

Caaag.
Subang, 08112010