Gentong Anakan

Ku: Wangsa Susena, S.Pd.I.

Kacaritakeun Mang Udeng jalma malarat boga gentong hiji-hijina, ngan dasar keur sial eta gentong nu hiji-hijina deui teh peupeus kabadug ku anakna nu cikal, nya kapaksa manehna teh nginjeum gentong ka tatanggana nu beunghar.

"Punten juragan !.. pami diwidian sim kuring teh seja nambut heula gentong kenging sasaiheun mah ..atuh da ..itu nu di rorompok kaleresan kalah peupeus ..ka dupak pun anak.. seja meser da teu aya kangge meserna… "Ceuk Mang Udeng ka eta jalma beunghar.

"Aeh …tong sabulan atuh …lila teuing.. kumaha mun saminggu ?..saminggu eta oge aya syaratna ?" walon jalma beunghar semu rada harerese diinjeuman teh.. da memang geus kasohor ku pelitna.

"Nya teu sawios juragan ! ngan eta naon nu janten syaratna ..nun ?" Tanya Mang Udeng

"Ari syaratna teu beurat… sok ieu gentong pake… salila saminggu tapi kudu dibayar.. !" Ceuk nu beunghar.

"Mangga bae ..sun ! Sabaraha sim kuring kedah mayarna ?" Tembal Mang Udeng nyanggupan bari tuluy nanaya.

"Nya meujeuhna ..bae ..saminggu teh sapuluh rebu perak, ..tapi dimana geus saminggu manehn teu malikkeun eta Gentong .. maka ku kami bakal di denda.. tina sapuluh rebu teh, jadi dua belas rebu ..perak… kumaha satuju ..?" Ceuk nu beunghar.

"Nya mangga sun !..sim kuring sanggem.."Ceuk Mang Udeng nyanggupan.

Nya geus aya kasapukan kitu mah, balik bae Mang Udeng teh ka imahna bari manggul gentong.

*****

Kacaritakeun geus aya samingguna Mang Udeng nginjeum eta Gentong, ngan Mang Udeng acan mulangkeun eta gentong ka jalma beunghar tea. Ku kajadian eta, maka torojol teh nu jalma nu beunghar teh datang, karepna mah rek nyokot gentong jeung duit sewaanana. Demi harita Mang Udeng kabeneran keur aya teu ka mana-mana. Ningali datangna jalma beunghar eta, Mang Udeng langsung ngabageakeun. Tuluy merenahkeun tamuna. Geus meranah duanana tuluy Mang Udeng nyarita:

"Bade nyandak gentong tea ..nya juragan teh ?"

"Bener ..euy.. geus saminggu apan ..wayahna eta gentong ku kami rek dicokot.."Ceuk jalma nu beunghar.

"Ke atuh antosan sakedap…"Walon Mang Udeng bari tuluy ngoloyong ka pangkeng. Teu lila geus norojol deui..bari mawa gentong leutik.

"Aeh..naha ..bet gentong leutik ..apan nu kami mah gede… henteu sagede kieu..aeh..aeh… kumaha ieu teh ?" Ceuk nu beunghar semu keuheul.

"Ke…atuh juragan .. teu kenging .. bendu heula ..sun…"Walon Mang Udeng. "Memang gentong juragan mah …ageung.. itu aya keneh dipangkeng.. teu ical komo bari diical mah..paralun…sun…"tambah Mang Udeng ngajelaskeun.

"Naha atuh bet ….gentong leutik eta nu disogrogkeun ka kami..? sok geura kadieukeun gentong kami …jeung kade poho ..bayaran sewaanana..!" ceuk jalma beunghar

"Kieu ieu teh .juragan… naon sabab ieu gentong alit disanggakeun ka salira juragan… tah …mangga nyanggakeun …ieu gentong alit teh minangka anakna gentong nu ageung tea…kaleresan …geuning gentong nu ageung gaduhna nu juragan teh …dikersakeun …geuningan anakan…"Ceuk Mang Udeng ngajentrekeun ngeunaan kasangtukang manehna nyogrogkeun eta gentong leutik.

"Ah…piraku siah… gentong make anakan.."Ceuk nu Beunghar teu percaya

"Ih sadaya-daya sun..! ieu mah buktos nyata…. Sanes sim kuring akon-akon ngabohong… leres ieu mah tah ieu buktos na.."

"Euleuh..kutan…. kitu…. Eum ?... nya mun bener kitu mah… geus lah ..eta gentong simpen bae…ku maneh.. antepkeun salila sabulan mah didieu… tuluy ieu gentong nu leutik ku kami rek dibawa… jeung ngeunaan bayaran sewaan geus ku kami dibebaskeun… teu kudu bayar sewaan eta gentong..ngan kade dimana anakan .. eta anak gentong milik kami" ceuk nu beunghar bari terus pamitan indit mulang.

***

Kacatur geus meunang sabulan.. jalma beunghar teh datang deui ka Mang Udeng, nya kebeneran Mang Udeng keur aya, siga nu ngahaja nungguan.

"Kumaha eum .. gentong kami geus anakan sabaraha ayeuna..?"Tanya jalma nu beunghar …

Ditanya kitu Mang Udeng ngarenghap sakeudeung tuluy ngajawab:

"Duh Tiwaas… juragan… gentong juragan teh maot… saminggu kapengker.. hapunten simku ring teu ngawartosan..ka salira"

"Alah …. Piraku siah.. gentong ..make kudu paeh…geus aya-aya deui..bae.. maneh mah..teu percaya …siah kami mah…teu…. Teu percaya…?"Ceuk nu beunghar

"Aeh…aeh… na kumaha ari Juragan ?.. Naha teu percanten… apan nuju diwartosan ..gentong anakan… juragan percanten… naha ayeuna…. diwartosan gentong maot…juragan teu percanten?" ceuk Mang Udeng.

??????

Caaag.

Subang,22102010