Haaar

Masih ngeunaan pangalaman nu mulang ti tanah suci, nu memang sok loba baé picaritaeunana, nu kabehna oge minangka pangalaman spritual masing-masing jama’ah. Cenah ceuk beja aya nu kasasar baé mun seug rek mulang ka hotel tempatna jeung jama’ah séjénna cicing salila di tanah suci atawa rek nuju ka tempat-tempat séjénna, cenah mah jalma nu kieu  kabiasaan hirupna tara mere tuduh jalan ka sasama bari mun seug dituduhkeun atawa dibere wejangan jeung sajabana téh sok apilain baé da ngarasa dirina geus mampu tur bisa.

Aya oge nu tara kabagean cai mun manehna seja mandi atawa susuci, cenah mah jalma nu kieu mah nalika di indonesiana sok koret kana cai, aya nu teu pupuguh dicarekan, tah nu ieu mah meureun di indonesiana sok sesentak baé boh ka kulawarga atawa ka nu séjén.  Jeung rea-rea deui pangalaman-pangalaman nu séjénna nu kabehana oge ngamuara kumaha pepelakanana amalna nalika samemeh méangkat ibadah haji, tegesna wawales amal téh lain wungkul jaga di akherat tapi nalika ibadah  haji oge sok ditingali-tingalikeun, kitu miturut carita pangalaman nu geus ngalaksanakeun ibadah haji ka tanah suci.

Heueuh kitu teana mah wajar da ibadah haji mah apan kaasup taubat saumur sakali, nu mun seug hajina mabrur tegesna ditarima ku Alloh apan wawalesna oge sawarga. Kitu miturut pitutur saur pidawuh Rosululloh s.a.w. “Al-Hajju Mabrur laesa lahu jazaa’un Illal-Jannah”.

oooOoooo

Salian eta nu kudu jadi perhatian jeung nu kudu jadi bahan ingetan téh dina masalah maca do’a-doa dina tiap-tiap rukun ibadah haji. Kaumuman jema’ah haji bejana sok parusingeun sabab teu sakabeh jama’ah bisa macana. Nu matak ku pimpinan rombongan ti KBIH bejana sok dibejaan cukup maca Do’a “Robbanaa Aatinaa Fid-dunyaa hasanah Wa fil ‘Aakhiroti hasanah Waqinaa ‘Adzaaban-Naar”.  Antukna ku sabab dina ngalaksanakeun ibadah hajina dina tiap rukunna ukur maca do’a sapu jagat eta, katelah bae ‘Haji Robbanaa”. 

Aya deui jama’ah nu ngaharewos ka pimpinan rombongan, yen manehna teu bisa maca do’a sapu jagat, ukur bisa maca takbir “Alloohu Akbar”. Nya ceuk pimpinan rombongan the teu nanaon maca takbir oge, atuh ku akibat gancang teuing maca takbir, nu kuduna “Allohu Akbar” jadi ‘Barelok…Bar..lok..barelok” atuh katelah jadi haji ‘Barelok’. Aya deui nu maca tasbeh “Subhanalloh” ku akibat gancang teuing jadi “Ban Alloh…Ban..Allloh “ kabayang kumaha mun bocor saha nu wani nambalna nya ?. Jeung rea-rea deui pangalaman sejenna.

oooOoooo

Aya deui carita pangalaman,  ieu mah sarengsena mulang ti tanah suci, kocapkeun salaki jeung pamajikan.

“Bapana …atuh sakali-kali mah urang berjama’ah sholat di imah bapana nu jadi imam kami nu jadi ma’mum…urang biasakeun, keun sawaktu mah urang cokot tina nu lima waktu, kumaha mun wayah mun wayah ‘Isya urang berjama’ah di imah”. Ceuk pamajikanana.

“Nya heug bae… indungna… alus nu aya… kami mah satuju-satuju bae..”Ceuk salakina nyaluyuan.

Isukna bener bae rencana the dilaksanakeun. Prung bae pas sholat isya datang the langsung maranehna duaan the berjama’ah sholat. Roka’at kahiji maca surat Al-Kaafiruun, roka’at kadua maca surat Al-Ikhlash.  Sapeuting lancar, peuting kadua, katilu teu aya nanaon. Ngan geus aya kana saminggu leuwihna, pamajikanana nyarita:

“Bapana….naha babacaan the ngan kulya ..deui.. kulhu deui.. eta deui..eta deui.. cik atuh menta nu sejen…”Ceuk Pamajikanana

“Ih… surat eta mah warisan ti bapa baheula…”Jawab salakina

“Lah ..teu bisa mah ngomong bae atuh ..make alesan warisan-warisan sagala…”Ceuk pmajikanana

“Heueuh kudu surat deui atuh nu kudu dibaca the…?” Ceuk salakina malik nanya

“Nya ..nu sejen deui atuh..!.. pokona mah mun isuk ..maca eta deui ..eta deui…ku kami moal dibere…”Ceuk Pamajikanana

“Yeeh…dibere naon heula ..ieu the..”Tanya salakina

“Lah pokona mah.. moal dibarengan sare…era atuh bapana ..ma enya gelar geus haji, piraku maca qur’an the teu aya peningkatanana.”Ceuk pamajikanana bari ngojengkang, tidituna mah meureun nitah ka salaki supaya diajar.

Dikitukeun ku pamajikanana salakina teu lemek teu nyarek. Ukur gogodeg.

ooooOoooo

Isukna kacaritakeun duanana geus siap rek berjama’ah sholat isya. Samemeh sholat pamajikanana ngawanti-wanti deui, ku ancaman nu kamari.

Kocapkeun rengse takbir tuluy maca patehah, rengse patehah salakina ngarandeg eureun heula teu babacaan..bari na hatena mah noroweco:

“Lah ..kumaha atuh ieu the.. mun maca kulya ..aing moal dibarengan sare… mun maca  surat sejen dumukna kuring the teu apal …na kudu kumaha atuh?”  Rada lila ngarandegna the… teu lila ujug lieuk the manehna ngalieuk, bari nyarita:

“Indungna…bae atuh nya ..kulya ..deui oge.. tapi tetep...dibere…nya ?... bae.. atuh..nya ?” Semu ngarayu 

“Haaaar…”ceuk pamajikanana

Caaag.

Subang,10-10-2010