Ku: Wangsa Susena, S.Pd.I
Ceuk katerangan yen mun urang bisa basa hiji kaum, daerah atawa bangsa dimana bae ayana, urang hamo katipu, tegesna beh dieuna urang bakal langsung loman jeung warga eta daerah. Atuh beh dituna, mun seug aya nu ngajak ngobrol jeung sajabana urang henteu bingung.
Ngeunaan pasualan basa, kocapkeun aya carita pangalaman nu anyar datang ti tanah suci, wallohu a'lam bener jeung henteuna mah, mun seug ieu carita bohong .komo kuring nu nyaritakeunana leuwih-leuwih ti bohong, ngan ieu mah urang husnudzon bae, itung-itung jadi pieunteungeun yen geuningan di ajar basa teh kacida pentingna.
Kieu caritana teh, aya dua jama'ah haji salaki jeung pamajikan. Sarengsena ngalaksanakeun salah sahiji rukun ibadah haji niatna mah seja mulang ka hotel tempat maranehna jeung rombongan cicing salila ibadah haji. Samemeh mulang ka hotel jorojoy manehna teh hayang balanja korma keur bahan oleh-oleh mulang ka indonesia.
"Akang ..kumaha atuh urang balanjana.. kapan urang teu bisa basa arabna..?"Ceuk pamajikanana nanya ka salakina semu nu bingung.
"Alah ..tong bingung-bingung …indungna… keun lah nu kitu mah gampang.."Jawab salakina ngareugreugkeun.
"Ah… Ma enya… iraha bapana diajar basa arab…? Jeung ka saha…?"Pamajikanana nanya deui bangun cangcaya.
"Yeeh… kapan basa arab mah sering tepung atuh… apan urang teh sok maca qur'an, hadits ..apan eta make basa arab… terus mun sholat .apan babacaana oge make basa arab…"Ceuk salakina ngajentrekeun
"Enya eta mah kami oge nyaho… lain eta bapana bisa kitu ngobrolna ..mun ayeuna urang balanja korma…. Jeung nu dagangna..?"Walon pamajikanana
"Alah …make basa sholat bae.. atuh indungna…geus lah ..cicing kumaha bapa bae .."Ceuk salakina
Geus paduengdengan kitu mah, tuluy duanana teh asup ka pasar, luak-lieuk neangan nu dagang korma, kacaritakeun duanana geus manggih, tuluy maranehna ngadeukeutan… tuluy pulah-pilih, urang arab nu dagang korma langsung nanawarkeun ku basa arab, eta salaki jeung pamajikan teh ukur unggut-unggutan siga nu ngarti.
"Tuh siah..bapana geuningan.. meni nyoroscos kitu eta ngomongna urang arab teh siga nu ngaji..bae…"ceuk pamajikanana
"Keun bae antep …ke ke ..rek sabaraha kilo…urang meli korma teh..?"Jawab salakinabari ditungtungan ku nanya.
"Ah… tong loba teuing kumaha mun korma biasa ..opat kilo… terus korma atahna 3 kilo… ditambah bae ..korma Ajwa… dua kilo…" Ceuk pamajikana
"Nya enggeus atuh ..ke urang diomongkeun .."walon salakina.. bari terus ngomong ka nu dagang korma tea.
"Ya sayyid !" bisana ukur eta, da puguh dibejaan yen mun seug ngageroan ka urang arab teh ku landihan "sayyid" ..mun basa urang …"tuan/juragan". Tuluy manehna teh bari tutunjuk ka korma biasa …celengkeng ngomong siga nu enya:
"Arba'a Roka'atin…arba'a roka'atin…"
Urang Arab katingali ngahuleng, tapi teu lila… tuluy manehna ngawadahan korma kana palastik tuluy dicangkoleun kana timbangan bener bae …langsung dikilo opat kiloeun.
"Bapana ..bener ..ngartieun geuningan ..eta langsung dikilo opat kiloeun… bener pisan.."Ceuk pamajikanana..
Salakina teu ngajawab… tuluy tutunjuk deui kana korma nu atah.. bari celengkeung deui nyarita:
"Tsalasa Roka'atin…. Tsalasa Roka'atin …. Tsalasa Roka'atin "
Teu talangke.. eta urang Arab teh katingali langsung ngawadahan ..tilu kiloeun.
"Alah bener pisan ….. eta ngartieun geuningan nya … kade bapana ..eta korma ajwa .. dua kiloeun..bae.."Ceuk Pamajikanana ngingetan.
Salakina teu ngajawab.. tuluy bae.. manehna teh ..tutunjuk deui siga tadi….ka lebah korma ajwa:
"Rok'ataeni…Rok'ataeni… Rok'ataeni…. Ya sayyyid.."
Langsung eta urang arab teh ngawadahan deui ..dua kilo…korma ajwa. Geus kitu mah tuluy dirapihkeun.. bungkusan eta korma teh. Ayeuna giliran mayar.
"Bapana…. Sabarahaeun ieu teh… ? kumaha carana ..nanyakeun sabaraha-sabarahana… ? sok ah masrahkeun.."Ceuk pamajikanana..
"Na make bingung sagala indungna….apan titadi oge urang make basa sholat…. Nya mayar oge ..angger bae ku basa sholat deui bae atuh… "Jawab salakina
"Na kumaha kitu..?"Tanya pamajikanana
"Ieu dipesak kami aya duit …urang berekeun bae kabeh… mun seug kurang ..meureun urang digeroan deui ku manehna… mun seug henteu hartina..meureun pas babayar teh.."Walon salakina deui. Bari kituna teh tuluy ngodok pesakna… bruk teh duit sayana dipesak teh diberekeun ka nu dagang korma, bari nyarita:
"Mustaqbilal Kiblati…Ada'aan ..Lillaahi Ta'aalaa….Wassaalamu 'alaikum"
Geus kitu mah duanana..tuluy arindit ti dinya bari ngajingjing korma ..ninggalkeun nu dagang urang arab nu olohok.
Caag
Subang, 10102010
Tidak ada komentar:
Posting Komentar